好快手呀！岩岩先播完第一集冇耐！咁快就比人恥笑啦🤣🤣🤣
多謝你篇報道呀！記得聽日十點要睇林婷啦～
【 ViuTV全新節目《入住請敲門》幾好睇！】
【 個個都驚鬼，唔通個個都驚鬼咩？！】
主持Louis點解叫「麒麟啤男神」？http://bit.ly/2ftrlcu
10月9日，ViuTV下午舉行「2018節目巡禮」，晚上立即更換Station ID片段，亦推出兩個新節目 ── 自製劇《短暫的婚姻》，以及十集靈異冒險節目、吳繼業監製的《入住請敲門》，攝製隊分別聯同「麒麟啤男神」 莫竣名 MCM Louis以及「邦民女」 Lam Ting 林婷，去到十家海外猛鬼酒店探險，總之唔猛唔去，愈猛愈要去，雖然農曆七月已過，但小弟向來細膽，聽到這類型節目，當然巧驚驚，但為咗要一睹男神首次主持節目水準如何，惟有頂硬上。
之所以選擇這十家酒店，全因一些都市傳說（Urban Legend），第一集，莫竣名飛往台灣桃園，直闖「因航」空姐（節目冇講，睇到制服估到係）經常入住的一家酒店。整體剪接、控制節奏，都做得不錯，作為觀眾，真係又要驚又要睇，而今次製作團隊更抵死到，邀請有陰陽眼的人看過片段和相片之後，列 ─ 出 ─ 有 ─ 靈 ─ 體 ─ 在 ─ 畫 ─ 面 ─ 出 ─ 沒 ─ 的 ─ 位 ─ 置！（歡迎自行測試，答案唔使話我知！）
Any肥，人人都驚鬼，唔通人人都驚鬼咩？冇錯，Louis接受小弟訪問時就係話唔驚：「呢個其實唔係好算一個靈異節目囉，因為我哋冇話專登扮鬼扮馬嘅，我哋上網睇完啲故仔，即係講話可能某一間酒店，曾經發生過啲咩事，咁我哋就專登去搵嗰啲地方或者嗰間房，我試吓自己一個住，然後睇吓有咩感受，因為我本身唔係好信有鬼，咁我就覺得，冇乜嘢嘅，雖然真係有啲地方係幾陰森恐怖嘅，但係你當係一個探險嘅節目囉！」
之但係，當Louis要挑戰直闖酒店「最猛」的地庫B2停車場的時候，他露底了，不是露出底底，而是他真係巧驚驚，所有真性情一下子在鏡頭面前爆發出來，完全無視男神儀態，喪講「仆街」，不只一次，而是多次，唓～～～又話唔驚？「嗰日第一日去嘛，少少驚都有嘅，你睇落去啦，之後我係進化咗！」我跟男神說，他一邊說仆街，我一邊喪笑，他覺得尷尬：「我覺得已經變成搞笑節目了！」
唉，笑笑笑，難為一班同行的創作部同事和攝影師呢，「我隊Crew嗰幾個，佢哋都幾驚㗎，有一晚，有個Writer直頭嚇到喊添！反而我自己就冇乜嘢嘅，我一開始頭幾日去都有少少驚，始終啱啱去未適應嘛，同埋我係抱住探險嘅心態，我覺得，唔知會唔會見到呢？睇吓會唔會可以擊破到自己啦，後來去咗幾日之後，好似冇乜特別喎，咁我就，算啦，都冇乜嘢，個人就反而大膽咗。」
咁樣樣，拍攝期間，有沒有發生過甚麼難忘的事呢？Louis話，事發地點並不在酒店，「反而係之後去咗台南有個廢墟，係一間舊醫院，未拆卸，但係成幢Building啲玻璃爛晒，成地都係玻璃碎，即係成個感覺係好似嗰啲恐怖Game咁，嗰個地方就真係比較恐怖，但係就冇話遇到啲咩奇怪事情咁樣。」咁你又話你大膽，勇者無畏無懼嘛，點知男神太自信，敲得門多終見鬼！「都係台南，有間酒店，因為我覺得太流喇，乜都冇感覺到或者見到，咁我就試吓搞亂間房，又拎本《聖經》出嚟讀啦，點知讀完之後，我突然間聽到背後有把女仔聲『HeHe！』咁樣，係好細聲嘅，呢個係我成個旅程（共11日）最深刻、最驚嗰一吓，嚇到我打晒冷震！」
Louis，咁你就要睇日本動畫大師宮崎駿的經典作品《龍貓》喇，話說兩姊妹與爸爸剛剛搬入鄉下生活，第一晚三個人一齊沖涼，聽到有怪聲，於是爸爸安慰兩個女，遇到驚嘅嘢，大聲笑就得㗎喇，唔信你下次拍《入住請敲門2》嘅時候，你同攝製隊一齊試吓呀，如果真的開拍第二輯的話，哈哈哈哈！若嫌今晚未夠驚，聽晚繼續睇，第二集有林婷入住東京池袋的墓碑酒店……
（09102017）
＃游大東 ＃即時電視筆記 ＃interview #viutv ＃莫竣名 ＃台灣 ＃猛鬼酒店 都市傳說 ＃都市傳說 方以文 睇電視喇喂 在香港 ‧ 過首爾時間 浪遊旅人 01娛樂 #因航 #國泰 #桃園 桃園事
Search